圖︰| 文：申力加
身為香港人，有一款菜色肯定是獨有文化回憶，就係「鐵板餐」！以前要嘆鐵板餐最近要去Calgary，而家唔駛啦，因為最近喺Edmonton Roger Place 後面開咗一間有鐵板餐供應叫做 One01 Bistro 嘅港式餐廳，佢仲附設停車場，十分方便。
餐廳不算大，但感覺十分乾淨企理，仲有 party room同埋Karaoke機，如果你有一大group人，不妨問下老闆包房。來到當然要試佢地嘅鐵板餐，有雜扒、海鮮同埋豬手三款選擇，雜扒同海鮮可配黑椒、洋蔥或蒜蓉汁，再加炒飯或意粉，十分港式。
上菜時醬汁另上，侍應姐姐叫我地打開紙巾，然後佢幫我地淋醬汁响鐵板上面，醬汁撞擊鐵板一刻發出吱吱聲香味撲鼻而來，好耐冇體驗過呢種食鐵板餐嘅儀式感。我地當日兩款都有試，牛扒一啲都唔韌，雞扒亦都十分嫩滑。至於海鮮就有大隻開邊龍蝦，兩款都有薯條墊底，如果你好大食建議叫雜扒鐵板餐，不過海鮮餐都已經好飽。兩款個人覺得雜扒餐味道同性價比高啲，但其實真好視乎你自己喜好，兩款都值得推介！
而家佢地仲做緊優惠，叫一個餐加兩蚊送一個籠仔飯，十分足料有風味，大蝦超級入味，大家可以試下，不過唔知優惠做幾耐。我地仲試咗燒牛肉套餐，牛肉新鮮味道亦十分好。如果唔夠喉可以最後叫個心太軟加雪糕做甜品，咁就完美完成所有願望。
最後評價係價錢對比質素屬於合理，佢地仲有其他飲品港式食物可以試一試，服務都十分有禮貌同快捷。我自己就比較鍾意呢類餐廳多過餐館小菜，難得 Edmonton 有一間，值得推介俾大家！
10508 101 St NW, Edmonton, AB T5H 2R8
Comments