top of page
  • KongED2

HK Woman x3 異域打拼新天地

已更新:2023年3月4日

文︰珍|圖:受訪者提供


三位女性,三種移民經驗。究竟港媽港女如何應對移民的挑戰?她們作為女性的角色有否轉變?看看她們怎樣說。


移居加拿大遇到的最大困難是什麼? 你如何面對和解決?


Holly:對比香港,我在加拿大少了家庭支援。以前有四大長老幫手照顧仔仔,買餸或煮飯等可幫輕下,我可以安心返工,放假有得抖下。而家兩公婆全天候返工加做家務同湊仔,24/7咁,真係好累嫁,成日唔夠瞓。解決方法都係兩公婆互相支持,分擔家務同輪住湊仔。平日好靠daycare去湊住仔仔,等我地可以安心返工。


Mandy:我覺得來到加拿大面對最大嘅問題係交通,因為我本身冇車牌,就算考完筆試,都要等一年先可以考車牌,所以去遠嘅地方,都要依靠呢度嘅公共交通工具。但我住嘅地方算係交通方便,所以我暫時帶兩個仔學嘢、買日用品或者自己返工返學都係靠巴士同LRT。只要係出門口前check清楚google map,基本上等車都唔係好花時間。


Rose:本來我對如何申請永久居民身份有點擔心,但我加入了社交媒體groups嘅分享對我很有幫助,再睇埋YouTube video,安心許多。另外,Edmonton 的冬季相當嚴寒,我仍在適應中,但我很喜歡這裡的許多東西,所以寒冷的天氣對我來說並不是很大的問題。



你覺得來加前後,女性在社會/家庭擔當角色方面,有什麼重大轉變?


Holly:簡直係衝過一切不可能,逼住要駕車外出。以前在香港係老公駕車,我就雪藏牌,而家係我駕車去接佢放工。 因為我英文比較好,所以好多時都要靠我去支援另一半,例如陪佢去銀行開戶口同準備晒一切移民的資訊。 真係來到先了解到自己嘅潛能可以有咁多。


Mandy:來咗加拿大後,我覺得作為一個女性喺屋企唔再係只擔當照顧者嘅角色,我同我老公會share屋企嘅工作,甚至兩個仔都有幫手做家務。喺呢度,女性可以係照顧者、亦可以擔當一個主導角色,作為女性嘅stereotypes會變得冇咁明顯。


Rose:我可以比較加拿大和香港之間的大學。在加拿大,人們對性別平等非常重視。在香港,我曾遇到幾次性別歧視,例如有人會說:「男仔彈琴比女仔好」、「大部分著名的作曲家都是男性」。還有人談論我的身材說:「你太瘦了,彈琴不會彈得好」。相比之下,現在的大學,所有教師和學生都反對各種歧視,包括種族、性別和職業,所以現在的我比以前更自信和開心。



移居加拿大後有什麼你最喜歡的人/事 /小故事?


Holly:最喜歡每晚一家人坐低食飯。同仔仔嘅關係更密切,以前喺香港係成日 OT,一星期得一餐一齊食。


Mandy:我喜歡呢度嘅人,呢度大部分人都係友善嘅,無論中國人定加拿大人,佢地都好喜歡幫人,就好似之前講,我自己暫時冇車,呢度識嘅朋友都唔怕麻煩車我地一家去買嘢,去玩、去食飯。呢啲嘢其實唔係必然,所以我好感謝佢哋。呢度人同人之間嘅關係簡單啲,壓力都少啲。


Rose:我在大學裡得到了兩位女教授很大啟發。她們總是對我們微笑,開玩笑,也關心我們的感受,尊重學生,給予評語總是正面的,她們激勵着我成為像她們一樣優秀的教師。



有什麼說話鼓勵其他已移居加拿大,或將移居加拿大的女性?


Holly:相信自己的能力,勇於嘗試,你會發現自己有無限的可能性。


Mandy:其實我自己都唔係來咗好耐,但喺度我學識咗「咩都要試」,唔好介意自己做嘅同原本唔同,呢度其實冇人care你做嘅職業,所以放低自己嘅枷鎖,俾啲信心,咩都嘗試一下,例如講英文、學車、煮嘢食,唔好話「我唔得」、「喺香港唔係咁」,咁你會發現原來好多嘢你都做到。


Rose:加拿大是一個可愛的國家,佢有廣闊的空間,極其友善的人民,以及良好的學習及工作環境。移民到一個新的國家可能會令人感到害怕,但可把它看作是一次歷險,也可以認識下當地的香港人社區。



曾聽到有女性友人說,移民後做了很多「男仔嘢」,如駕車、掃油漆、搬運、維修等。也聽過其他女性友人說,移民後做了很多「女仔嘢」,如湊仔、煮飯、家務等,也不再為事業打拚。無論做多了什麼,做少了什麼,都發覺原來自己有很多以前未發現的能力。以上三位女性,反映香港女性的能屈能伸,靈活獨立,樂觀苦幹的精神。


藉着三八婦女節,祝福每位離開了的人,或留下來的人,在社會的洪流下,都找到自己的位置,安於所在的土地。




173 次查看0 則留言

最新文章

查看全部

Comments


bottom of page