文︰柴笛該也
獻給我愛嘅每套韓劇、每個綜藝、每部電影；用港式廣東話口語，與你分享點滴。
喺講韓國電影前，等我約略解釋吓韓國影業名詞及其衍生出嚟相關嘅稱號。今期率先介紹嘅係「忠武路」。
對於叻叻嘅遊客而言，「忠武路」(충무로)係首爾subway 3號線(橙色)、4號線(天空藍色)嘅轉換站。3號線忠武路北面則有「乙支路三街」(을지로3가)同「鐘路三街」(종로3가)，係「布帳馬車」(aka大排檔) 勝地；4號線忠武路西面有「明洞」(명동)，東面有「DDP東大門」(동대문) ，係文化潮流聚腳點。知埞嘅你，實知我講緊邊度。
影迷底嘅，可能去過擁有忠武路站戲院專用出口、共8個screen、連埋basement全座9層嘅大韓劇場(대한극장)。話唔定唔止喺building出邊打過卡，直頭入去埋、參觀埋頂樓嘅天空玫瑰園/露天影院(Sky Rose Garden/Cinegarden) 、喺入邊食過嘢、買過飛睇戲添！
Source: https://t.ly/ZRi6
Source: https://t.ly/6nDU
大家今日見到嘅玻璃外牆大廈，係2001年原址重建嘅成果。呢個地段，加埋明洞，喺上世紀日侵時期，被日軍強行稱為「京城」嘅「本町通」，寓意將之打造為首爾市「最繁華嘅街道」(日本喺自己城市係咁以「本町通」命名同規劃，所以佔據咗人哋嘅地方都照辦煮碗。e.g. 喺仁川有「本町通」；佔據咗台灣，都喺臺北整咗個「本町通」) 。隨住日本喺1945年戰敗投降、韓國獨立後，當時政府就將嗰時叫「漢城」嘅「本町通」地域重新rezone，以16
世紀、朝鮮時期一等抗日功臣李舜臣將軍嘅諡號「忠武公」，將「本町通」改名為「忠武路」，一直沿用至今。光復家園之心跡不言而喻。 李舜臣將軍，即係《港ED時報》第44期內提過嘅電影《閑山：龍的出現》(2022)中、由朴海日飾演嘅歷史人物。
Source: https://t.ly/5Ran
下圖為50年代落成嘅大韓劇場初貌，同拆卸前、2000年5月最後上映嘅「成吉思汗」(징기스칸)嘅兩塊billboard。第一代嘅大韓劇場建築，係無乜窗嘅…嗰時負責設計嘅，話用當年「至巴閉」嘅冷氣系統、唔使要窗門唞涼。嗱，唔好問我「換氣量」、「空氣淨化設備」如何…當年冇「武肺」遺禍人間，冇呢啲KPI，OK?
Source: https://t.ly/hvTW
由日侵、到光復後、直至70年代，喺鐘路到忠武路，聚建咗大量戲院、電影製作公司、同埋大大小小嘅影業配套。Geographical clustering係當陣時菲林矜貴嘅logical and economic consequences。有冇聽過上一輩香港影人、講黑社會夾持菲林攞贖金嘅故仔？知唔知乜嘢係「走片」？喺菲林時代啲新片嘅拷貝，點樣由電影公司安全、快捷、準時地運送去戲院以作首日播放？喺韓國都有類似「咁嘅樹」啦。Anyway，要靠觀眾肯揞荷包買飛入場睇戲、課水投資嘅老細先賺到錢，質量自然要好；in other words，你啲貨唔sell、套戲就無你份，simple as that。電影從業員同演員們嘅夢想，就係能夠拍攝、參與忠武路公司嘅製作。就係咁，忠武路就有著韓國影壇顯赫嘅江湖地位，成為韓國嘅荷里活。久而久之，「忠武路」出品成為咗韓國超地域、質量高、口碑好嘅影業同義詞。
時移勢易，忠武路地價今非昔比，電影媒介亦由菲林轉至digital footage。以往因利成便而集結喺忠武路嘅studio及其周邊配套(렌탈샵)，亦盡數遷移到8、90年代地價相對較為平宜嘅江南新沙洞林蔭大道，或者麻浦區上巖洞一帶。話時話，呢啲地段嘅身價，今日已經水漲船高，家下風氣係面子行先，租要貴、先顯得間公司掂。值得一提嘅，係CJ Group旗下嘅CJ ENM喺2020年10月籍收購嘅CJ Humanville (CJ 인재원)落腳忠武路；此舉係咪想暗示自己要「再執忠武路牛耳、重領忠武路風騷」、fight低Lotte Entertainment, I guess time will tell。
See you next time👋！