top of page
  • KongED2

[天韓地凍會] -- 韓影 : 仙后座Cassiopeia 카시오페아

文︰柴笛該也

獻給我愛嘅每套韓劇、每個綜藝、每部電影;用港式廣東話口語,與你分享點滴。


根據世衛2023年5月嘅資料顯示,全球有大概55 million人被診斷為失智症 (dementia) 患者,而當中阿爾茨海默氏病 (Alzheimer’s Disease) 為數最多。雖然Alzheimer’s病人大多為長者 (65歲病發被視為early onset),但係呢種腦病變亦可能侵襲中年人,對病人、尤其係至親家人,喺身、心靈、甚至財力,皆做成極大負擔同困擾。2022年6月上映嘅韓國電影 《仙后座》(Cassiopeia 카시오페아),正正就係描寫一對被Alzheimer’s 突如其來嘅噩耗打擊嘅父女,奮力掙扎、抵抗殘酷洪流嘅歷程。《仙后座》由申言植導演編劇兼製作,申導演cast嚟同自己已經「兩搭」(《公平的愛》 (2010) ,《演員就是演員》(2013)) 、有「國民影帝」美譽嘅安聖基做阿爸,阿女一角就交咗俾「唱而優則演」嘅徐玄振


故事講述後生時「為糊口 四圍走」嘅老竇仁宇(安聖基 飾),退休後受吓個大狀叻女秀珍(徐玄振 飾演)嘅「差遣」,閒時撚吓孫女Gina(朱藝琳 飾)。呢邊廂父女關係疏離,嗰邊廂母女感情則「半半」;一時就同個女玩到糖黐豆,一時就一言堂。可能秀珍細個時 Father MIA,所以大個之後都獨行獨斷,自己決定送Gina出國去前夫度讀書,任何人都抗議無效。出國準備正如火如荼,秀珍忙到踢哂腳,於是又出動老竇,過嚟住吓,幫手湊孫,湊到Gina飛走為止。一日,秀珍發生車禍,照完腦,卻意外確診 Alzheimer’s,原來失智之徵喺秀珍做嘢嘅律師樓早有跡可尋,秀珍更面臨巨額訴訟…秀珍要求仁宇向即將赴美留學嘅Gina隱瞞病況,等Gina一走先開始積極参加病友家屬support group etc。因為年輕,秀珍腦退化得比年長患者快,瞬間生活自理都成問題,好嘅日間看護一個都搵唔到,秀珍更險遭毒手,仁宇唯有硬食,見步行步。可恨屋漏偏逢連夜雨,仁宇發生嚴重車禍,秀珍身邊碩果僅存嘅照顧者冧埋,紙亦再包唔住火,終於…



套戲上畫前嘅訪問中,申導演以拍出安聖基以往「未展現過嘅一面」深感滿意,亦對徐玄振嘅努力同態度有高度嘅評價。有見《仙》失利於2022年票房同獎項,淪為當年嘅滄海遺珠,柴笛該也特意撈返上嚟介紹吓,順便希望申導演同宋康昊dramaland debut《三植叔叔》大發 🙌 (yup 又可以見到卞約漢)!


Gina話俾媽咪秀珍知,喺北半球迷失方向時,搵到Cassiopeia,就搵到北極星、搵到方向,自己就係秀珍嘅Cassiopeia。透過not sugar-coated 嘅101分鐘,申導演以此電影,表揚身為慈父對女兒如仙后座般、唔單止喺夜晚,就連喺白日,都發揮其守護嘅光芒。祝福大家搵到屬於自己嘅Cassiopeia


Trailer with Chinese subs


See you next time👋!



19 次查看0 則留言

Comments


bottom of page