top of page

一人一個騎呢新年習俗

圖:Hollis Johnson/Insider|文:小魚

有些騎呢新年習俗聽來迷信得啖笑,承傳不承傳也無所謂,但對一些家庭來說則十分重視。近年不少港人移民 Edmonton ,我們就以下問題收到7名港人對新年騎呢習俗的看法,看看有沒有一些和你屋企一樣?


1. 家家戶戶過新年,阿爸阿媽阿爺阿嫲阿公阿婆,總會叫你做/唔好做一啲事,唔係就唔吉利咁話。你有冇類似經歷?你會點做?有冇聽話follow呢?


2. 到今時今日,你仲有冇保留住呢個習俗/事情?為什麼?


3. 人在加拿大/即將到加拿大,有冇打算將呢個習俗/事情傳俾下一代,以保留中華文化/家族傳統?為什麼?


4. 對於新年習俗(騎呢/非騎呢),有冇其他感想?



聾五


細個時阿媽話初一至初三都唔准洗頭(佢話最好到初七添!),唔係成年都唔老嚟。細個冇得揀唯有照做啦,想提早開年咩?呢個習慣我當然冇保留,我唔想去見人時有烏蠅嬲住個頭。呢個咁特別嘅習俗,我梗係唔會傳俾下一代,因為我唔想屋企新年時傳出異味!


其實阿媽都係為我好,唔想我嗰年唔老嚟,不過幾日唔洗頭真係好難頂囉。如果有其他唔太難頂嘅習俗,我都唔介意follow 嘅。完。



任何人


年三十晚要用椂柚葉煲水沖涼。不過而家用花灑沖涼多,所以我係會沖涼之後,放一大紥椂柚葉喺頭頂淋幾下就算。如果喺外國平平地買到椂柚葉的話,用來沖吓都唔驅!


撇除金錢利益,新年習俗都係文化之一,值得傳承!



Ivan


初三之前唔好掃地拖地。當然冇保留住呢個習俗啦,屋企咁污糟好難唔掃地啫!自己都keep唔到,唔相信下一代做得到。明白理解保留中華文化,但係不合時宜。



Silly


新年唔可以講個死字:死人頭、死喇、死火、死仔、死八婆... 移民加拿大後,如果過年聽到 d啲細路講個死字都會話唔好意頭。我會保留住呢個習俗呀,當玩捉字蝨,都幾得意吖。


其實呢啲習俗都有傳統智慧,都係希望家人平安健康,而且人在外地,如果連少少無傷大雅既習俗都忘掉,慢慢就連這些傳統智慧都會消失。



勁哥


細個時阿媽吩咐年初一要收埋啲利器,刀同鉸剪,全日都唔可以用,否則新嘅一年全年會有機會遇到血光之災。另外,年初一唔可以掃地同掉垃圾,因為會掃走哂啲財!細個時唯有跟足阿媽指示!


到我地成人時,連阿媽自己都冇再保留呢啲騎呢習俗,更何況我呢,當然冇再保留啦!

連我自己變作成人時,已經冇跟隨呢啲習俗,我當然唔會再傳俾下代啦!呢啲傳統根本係迷信。


新年習俗之一︰派利是,應該一早廢除,好無謂,派來派去,其實大家鬥多仔女,越多仔女越著數!自從來到加拿大,我已經停止呢個派利是嘅習俗。



尖屎


阿媽話新年要著新睡衣,仲叫我就算親戚朋友來都可以著住睡衣招呼人。後來大少少覺得好奇怪,人地著住去街衫,自己著住套睡衣好似老爺咁款,之後再冇做呢件事。


新年著新睡衣就冇保留,但可能會買套新底衫褲應吓節。


我仲後生未有下一代住,有的話,我會講佢哋知佢阿爸細個做個呢件騎呢事。



馬仔


我哋屋企要喺新年嗰幾日,特登走去長生店見吓啲棺材,寓意「升官發財」。細個仲以為人人都係咁做,仲問同學︰「乜你冇去咩?」之後俾人問候。


今時今日人在加拿大, 好難淨係見到棺材,見唔到個dead body 喎。所以呢個習俗好難傳俾吓一代。


新年習俗都係希望大家平平安安,如果唔太費勁可以保留到,咁咪保留囉。



恪守農曆新年習俗也像是在保存及承傳家庭的信仰和活動,也是我們的重要回憶。筆者小時候過年最深的印象,就是去不同長輩家拜年。家住港島區卻可以去上水、沙田、旺角,可以坐不同交通工具前往很遠的地方,也見証了這些區份的發展。除了可探訪不同區份和觀察不同的家居環境外,最有趣的是可以和他們家中的寵物玩耍。如今移民到加拿大,在這裹沒有親戚,卻惦念那探訪親戚的樂趣。利是只派給自己兒女,也不忘給那些經常幫襯的店員。在香港生活時,派利是和收利是已成一般習慣,但人在海外,有機會派利是和收利是都額外感到興奮和珍惜。這是你第幾年在外地過農曆年呢?你會怎樣過?你又會如何把這節日傳統承傳至下一代呢?




29 次查看0 則留言

Comentarios


bottom of page