圖︰分手的決心| 文︰柴笛該也
獻給我愛嘅每套韓劇、每個綜藝、每部電影; 用港式廣東話口語，與你分享點滴。
喺《港ED時報》第44期、講第43屆青龍電影獎時提過、韓國驚悚愛情片《分手的決心》喺去年2022年5月、第75屆法國康城影展做咗 world premiere。執導演筒嘅係「復仇三部曲」(《我要復仇》、《原罪犯》、《親切的金子》)嘅導演朴贊郁，寫劇本係已經三度同朴導演合作共編(《親切的金子》、《饑渴誘罪》、《下女誘罪》)嘅作家丁瑞慶(drama作品有「忠武路三金」之首嘅金高銀強勢演出、2022年嘅tvN《小女子》)；男、女主角分別為朴海日與湯唯。 齋睇牌面，已經知係「攞獎格」。
故事開始於韓國南岸嘅釜山市，最「後生」見board、somehow 依然只係升到「警監」 (膊頭兩朵無窮花 / 6級公務員)嘅刑警張海俊(朴海日 飾)，同當正海俊係「偶像」嘅後輩拍檔、位居「警査」(膊頭四朵無窮花花冧 / 7級公務員) 嘅吳秀完 (高庚杓 飾)， 喺調查一宗被受注目、但係久久未破嘅兇殺案時，因一單新嘅墮崖命案，而與生前任職移民部審查官嘅死者奇道秀(柳承穆 飾) 嘅遺孀、自認「睇史劇、學韓文、韓文麻麻」嘅中國移民宋瑞萊 (湯唯 飾) 發生咗關係… 係差人與犯嘅對立關係。經過一輪輪盤問、跟蹤兼「監視」之後，秀完誓神劈願、話瑞萊有殺夫之嫌，海俊卻被本能與誤會驅使、為瑞萊開脫嫌疑犯之名，以至日後各人、包括同海俊結咗婚16年8個月、最年輕嘅梨浦市(虛構)核電站嘅安全控制員妻子安靜顏(李貞賢 飾)嘅生活，出現如大自然潮汐般無法抵擋嘅巨變。
話說睇咗朴贊郁導演嘅戲，會被佢嘅視覺藝術對比、人物嘅溝通方式與對白、故事表達手法帶嚟好有趣嘅沖擊。朴導演承認，佢鍾意以此刺激觀眾思考。《分手的決心》中設計嘅牆紙pattern、衣物顏色、鏡頭focal point、同框唔同場、voice messages、text messages、smart phones、smart watches、語音翻譯、食字、微妙地透過眼藥水、手錶、望遠鏡、N袋大褸、hand cream 、lip balm、烏鴉、水桶、飯餐、雪糕、煙仔、頭燈、石榴、鱉、山石泥沙、雨霧雪海等等，將「我愛你」、講與做、禮與儀、實與虛、剛與柔、山與海、仁與智、古與今、生與死、合與離、聚與散等議題赤裸逞現。朴導演細膩展示主人翁之間嘅關係，明明應該水火不容卻出奇地合拍、情感如幻似真;片長138分鐘內，彌漫住黑色幽默之餘，情節絲絲入扣又曖曖昧昧，或許，如迷霧般捉摸不定，對某啲人嚟講，先最耐人尋味、引人入勝同讓人不能自拔。片中嘅懸案，導致自負好勝嘅海俊長期失眠；偶爾出現嘅台灣名酒噶瑪蘭威士忌 Kavalan Whisky則冇懸念，純粹係朴導演嘅至愛 😂。
朴導演透露咗最初嘅故事概念，男一要係探員，而女一只需要係個嫌疑犯；佢同丁瑞慶作家因為想cast 朴海日，especially 湯唯，如是者，《分手的決心》係佢倆首部「先假定演員、後寫劇本」嘅電影，i.e. 居韓中國移民嘅女一角色，係為湯唯度身定造。由影片喺電影節嘅得獎數目嚟睇，証明咗兩位今次嘅嘗試係成功嘅。翻查記錄，除咗去年6月同8月，喺過往一整年，《分》每個月… yup係. 每. 個. 月！都有喺全世界、各種規模嘅電影節、可以攞得奬嘅範疇中被提名、入選角逐、甚至獲得獎項。由舊年5月、喺康城影展、朴導演摘下最佳導演獎開始，all the way up till 上個月，喺第59屆百想藝術大獎、勇奪電影部門大賞、最佳導演、最佳女主角為止，喺wiki《分》嘅獎項table，碌極都碌唔到底咁滯，蔚為奇觀!
睇完都唔多明? 睇吓呢兩條片幫唔幫到你?
By中隊長的拉片筆記
呢場戲入面，海俊問瑞萊嘅問題︰
柴笛該也諗，答案喺呢場戲早有跡可尋︰
See you next time👋！
References: