圖/文： Neko
最近Edmonton 落雨濕濕，都冇阻Neko 出去發掘啲食好西嘅好地方。有人會問，有冇試過中伏，俾個外表呃咗😅。其實都有發生過，不過Neko係咁諗嘅，每樣嘢都試下，可以嘅就支持下本土生意。至少俾兩次機會，都係唔好嘅就唔好再去啦🙄。
Edmonton Brewery District，前身係Oliver Square。覆蓋範圍都幾大吓，類近South Common 咁嘅設計，分開咗一舊舊。亦包含咗唔同類型嘅餐廳，咖啡店，運動用品店舖又或者Grocery market。
而今次想同大家介紹嘅，係一間唔太起眼啡色磚頭，縮埋一角嘅精緻店舖。 Neko 都用咗啲時間揾間嘢係邊🤔。睇到依度，你哋可能會估到Neko 講緊邊度，又可能已經去過食雪糕。不過Neko 係去隔離果間食brunch 嘅Wilfred’s，入到去先知原來雪糕店同brunch 都係同一個地方。一入門口就有host 問係食雪糕定係brunch，雖然係同間舖位，但係 section 都分得清清楚楚。
因為舖面位置有限，如果太晏去可能會等一陣先有位。整體嘅設計都好特別，特別係半圓嘅枱，可以根據人數靈活運用有限空間，容納最多客源。每張枱都好有心思咁放咗唔同嘅花花。就算未嗌嘢食都已經賞心悅目啦🥰。
一般小型餐廳，menu 嘅選擇唔多，嚟嚟去去都係big breakfast，benedict，pancake 或者Breakfast Bowl，但勝在價錢合埋。雖然話間間食bruch都係咁上下，看似一樣但係做法又有少少唔同。好似Wilfred’s 咁，佢哋嘅scone係自己出品，一般係muffin 陪襯都用scone 嚟代替。佢哋嘅scone 真係冇得彈，冇諗過同Benedict 會咁夾。下次再去嘅話一定一定要食埋雪糕🍨先好走😋。
Wilfred’s
10429 121 St NW, Edmonton, AB T5N 1L2, Canada