top of page
  • KongED2

天韓地凍會 -- 韓影︰《非常宣言》비상선언

圖︰《非常宣言》| 文︰柴笛該也


獻給我愛嘅每套韓劇、每個綜藝、每部電影;用港式廣東話口語,與你分享點滴。


暑假將至,又係一家大細逼爆機場、搭飛機外遊嘅時間啦。今期介紹嘅呢套戲,儘管有「大滿貫」級新人導演、影帝、影后、配角等人馬擔綱,應該唔會俾你搭飛機時、喺Korean Movies個list搵到嚟睇。

韓國驚慄航空災難片《非常宣言》(港譯:《緊急迫降》) 喺2021年7月16號、第74屆法國康城影展作全球首播。由韓在林導演執導同編劇,演員陣容有宋康昊、李炳憲、金南佶、任時完、全道妍、金素辰等,簡直係dream cast。


故事講述一名男子(任時完 飾) 喺首爾仁川開往夏威夷🌴嘅航班Sky Korea 501內,向機上乘客發動生化襲擊,視死如歸。收到飛機恐襲情報嘅探員(宋康昊 飾) ,繼而與國土交通部長官(全道妍 飾) 聯手,誓要讓「忽然坐正」嘅first officer(金南佶 飾) 將航班安全著陸,奈何此番緊急迫降,遭遇重重困難…


大型災難片其中一個賣點,就係個set要迫真。《非》嘅production team 投入大量金錢同時間,以高科技打造1:1「機艙」實景、以進行360度拍攝。參見《非》製作花絮︰


另一個賣點,就係必定會揭露人性醜惡、同歌頌人性光輝。《非》唔單止做到咗,再加多幾腳,諷刺埋over晒嘅傳媒行徑、令人欲哭無淚嘅官僚主義 、「虎媽出優兒」嘅迷思,韓導演更勇敢地幽咗韓國民族自尊心一默…


《非》拍攝時正值「武肺」肆虐,曾被一度叫停。公映日期亦因「武肺」餘波一拖再拖,結果足足要喺康城首播後一年嘅2022年8月,先喺南韓(IMAX + 4DX 🤩😱) 及其他地方上畫。《非》為任時完帶嚟數個男配角獎,亦讓金素辰(飾演 purser) 多添一個女配角獎。遺憾地,本片未能從「三大」獲得任何獎項。As for老闆們最緊要嘅條數方面,雖能回本,卻非大賺。成績令人跌晒眼鏡,到底問題出咗喺邊度呢?Wrong timing? 題材敏感?得罪方丈?忠言逆耳?


建議閣下,千祈千祈唔好喺搭飛機嘅時候、用141 min睇,咁喺睇完之後,就算巧心噏、巧驚驚,都可以出街行個圈、散吓心、話「做戲啫、假㗎」咁自我調劑一番。若然閣下「唔覺意」見到你隔離位喺飛機度睇咗, 之後表現得坐立不安、upset到爆咁款,請記住昅實佢,以防佢「想早啲落機」、打開機倉嘅緊急出口… 講笑咋(… 唔會咁蹺啩)!!

Teaser:


祝大家旅途愉快、逢凶化吉、化險爲夷🍀。See you next time👋!



25 次查看0 則留言

Comments


bottom of page