top of page

天韓地凍會 -- 韓影︰12.12︰首爾之春

文︰柴笛該也

獻給我愛嘅每套韓劇、每個綜藝、每部電影;用港式廣東話口語,與你分享點滴。


呢個月4號「立春」, 咁就講吓《12.12:首爾之春》啦!


舊年11月22號喺韓國開畫、首度改編自真實事件「雙十二政變」嘅《12.12:首爾之春》(《서울의 봄》),係講1979年12月12日(由夜晚7點到第二朝凌晨4點)全斗煥叛變嗰關鍵9個鐘嘅來龍去脈。(按:全斗煥就係1980年5月18日光州大屠殺嘅罪魁禍首,佢個孫全宇元都係咁講嘅。)

1979年12月12日晚,時任保安司令官全斗光(黃晸玟(或譯 黃晸珉) 飾,原型全斗煥) 發動軍事政變,首都警備司令官李泰信(鄭雨盛 飾,原型張泰琓)奮力對抗。其他要角,包括:陸軍參謀總長兼戒嚴司令官鄭相鎬 (李成民(或譯 李星民) 飾,原型鄭昇和) 、全斗光得力助手盧泰建(朴海俊(或譯 朴解俊) 飾,原型盧泰愚) 、 陸軍本部憲兵監金准燁(金聲均(或譯 金成均) 飾,原型金晋基)等;加上鄭東煥、金義聖,仲有特別客串嘅李浚赫、安聖基、丁海寅等,而且幕後忠武路級班底堅實,無怪乎呢部戲能夠成為2023年度繼《犯罪都市3》後、第二套「觀賞人次」過千萬嘅電影,與《逆權大狀》一樣、喺第33日達標,上千萬電影榜。雖然《犯3》喺第32日突破千萬觀影,但係論票房總成績,《12.12:首爾之春》跨越《犯3》,成為年度最強。


兼任編劇的金成洙導演明言,為咗增添觀賞趣味性,有加啲虛構嘅人物、情節同場面,係有利申的。就呢點,韓國普遍、就連新一代都好buy (& box office doesn’t lie),口碑熾熱;the other side of the spectrum認為應該忠於歷史,要尊重史實。個人認為,entertainment嘅嘢,梗要顧及商業利益。佢唔係教育電視,都要同股東交數㗎。其實,大可乘勢搵個德高望重嘅historian嚟出集《12.12:首爾之春 之 熟真熟假》,講吓邊場戲係真有其事、邊場戲係作嘅etc,make it interesting,實行抽乾太平洋都得啫😂。再者,攤開嚟、大大聲講幾時都係好事嚟㗎,絕對比陰啲陰啲、唔聲唔聲竄改教科書、刪改曆史文憲嗰啲嚟得正路。


大家可以諗諗全斗光點樣(以為)「過咗海就係神仙」(全喺戲中名句: 「失敗就叛逆、成功就革命,唔係咩?? 」( 將呢句台詞講到「嘴唇震震」嘅黃晸玟啲演技真係冇得頂),再諗諗件事點樣育成現代韓國可以「不流血成功罷免總統」嘅民主基礎。加拿人率先喺舊年12月頭有screenings,英、美、澳、紐就一星期後、台灣亦已於12/15 (五)上映,日本慢極都(今年)2月中,唔知香港仲要等幾耐呢?


《12.12:首爾之春》令1994年出道嘅影帝鄭雨盛晉身「千萬演員」行列🎉 (李成民、朴海俊、金聲均 as well; 黄晸珉係3rd timer啦) (恭喜晒!)🎊


有年輕女粉(粉媽同鄭雨盛一樣大,都係73年出世) 向鄭雨盛當眾求婚,顯示「入伍」嘅鄭雨盛魅力非凡。金導演更挑機李政宰(《Hunt》導演) 、睇吓邊個可以將鄭雨盛拍得更型仔!


好耐無同大家玩(無獎)問答遊戲啦,有冇掛住先🤣…請以main plot順時序排列呢幾套同韓國民主運動史有關嘅戲,答案下期分曉。

《12.12:首爾之春》


《Hunt》


《逆權司機》


《逆權大狀》


《1987:逆權公民》


《南山的部長們》


《華麗的假期》


See you next time👋!


Trailer

 

Reference

11 次查看0 則留言

最新文章

查看全部
bottom of page