天韓地凍會 -- 韓劇: 山寨人生 넉오프
- KongED2
- 5月2日
- 讀畢需時 2 分鐘
圖: 山寨人生 |文: 柴笛該也
獻給我愛嘅每套韓劇、每個綜藝、每部電影；用港式廣東話口語，與你分享點滴。
較早前放風、話《山寨人生》(넉오프 / Knock Off) 將於今年4月上架，奈何喺2月、男主角金秀賢被捲入金賽綸家中身亡事件。金秀賢受千夫所指，代言商戶紛紛割席，Disney+ 暫時hold住《山》嘅release。 諗返喺《港ED》第65期寫過tvN嘅收視冠軍劇《淚之女王》， 話咁快就一年啦，金秀賢就係憑住《淚》一劇人氣事業globally登頂。 宜家金秀賢嘅遭遇，係佢主演嘅另外一套drama《來自星星的你》嘅劇中女主角千頌伊嘅翻版。千頌伊被指與其競爭對手女演員韓幼娜嘅”跳船自殺”有關，地位由A-Lister直插谷底…
金賽綸過身後，佢同金秀賢嘅昔日地下戀情細節，開始喺YouTube channel《橫豎研究所》曝光。喺係唔係拖友、債務處理糾紛、成年與未成年、金賽綸過身有幾關佢事等等嘅爭拗陰翳之下，除咗《山》被叫停，金秀賢要退出人氣綜藝《Good Day》，原定3月30日赴台灣高雄出席「櫻花季」音樂節亦安心出行唔到，所有違約金額合計恐達天文數字。同人唔同命，喺HK有成年人與未成年拍拖、生仔，都可以扶搖直上、平步青雲、受盡擦鞋仔景仰、財源滾滾(應該係唔收美金，除非唔係)㗎。不過秀賢呀，唔使羡慕禮賓部Johnny哥㗎，因為佢遲早要還㗎。
事關柴笛嚟緊又要唞唞，預早起埋第77期俾《港ED》編輯手足。閣筆之時，韓國代總統韓悳洙剛剛被復職。柴笛想知︰無喇喇宣布戒嚴而被彈劾嘅尹錫悅使唔使下台，同埋假若唔使坐監兼成功復職留任總統，會唔會靜靜雞去多謝《橫豎研究所》主持人拖住netizens漫罵咁耐傷晒神、冇心機理佢罷唔罷免得成。至於能否好似千頌伊咁可以鯉魚翻身，就要睇吓金秀賢身邊有無個類似都敏俊嘅外星人出手相助喇。
有緣再見👋！
Kommentare