妙麗的回力鏢

文：Z世代翻譯官 | 圖：網絡圖片

Emma Watson近日嘅一個舉動，令佢再一次成為輿論風暴嘅中心。呢位憑住《哈利波特》系列成名嘅演員，過去一直表現得好「政治正確」，曾公開支持跨性別運動、捐款俾具爭議嘅慈善組織 Mermaids。當年J.K. Rowling因為反對部分跨性別政策而遭受猛烈圍剿同死亡恐嚇時，Emma係公開站喺「進步派」陣營一方，變相加重咗對Rowling嘅壓力。

政治正確不代表歷史正確

但風水輪流轉。當Emma近期突然向Rowling示好，表示「愛和珍視」佢時，Rowling冷冷地回應，直斥Emma對現實世界同女性權益一無所知，無知到連自己無知都唔清楚。而更諷刺嘅係，當日Emma所支持嘅一班左翼社會運動家，今次竟然將矛頭轉向佢。Emma當年以為自己站喺「政治正確」一方，可以憑此贏盡掌聲；但當佢一有半句和解、甚至只係表達對Rowling嘅尊重，就瞬間變成「敵人」。

GB News主持Andrew Doyle對此評論得一針見血：「Emma Watson現在才了解到，她一直所支持的社會運動家的本性，實在有點為時已晚。」Emma當日以道德高地去審判Rowling，今日卻被同一班人以同樣手段審判。

羅琳式筆鋒

Rowling嘅回應文筆極為犀利，並無粗言穢語，但字字切中要害。佢指出Emma從小就爆紅、少年得志、財富地位兼備，根本冇親身經歷基層女性喺公共醫療、公共廁所、更衣室、庇護所等地方面對嘅真實困境。Rowling仲直言，Emma所謂嘅「愛與珍視」根本只係因為風向變咗，驚自己嘅立場被時代淘汰，先至忽然「遞橄欖枝」。Rowling毫不留情咁將佢批評為「ignorant of her own ignorance」（無知到連自己無知都唔知）。

Rowling善用諷刺、對比同具體場景描寫，將Emma嘅「紙上同情」同自己血肉之軀經歷過嘅困苦對立起嚟，形成強烈反差。相比之下，Emma既冇實質理據，又冇生活經驗支撐，只能靠抽象嘅口號同姿態維持形象。

道德表演

唔少政治正確嘅口號，往往只係一場「道德表演」。喺社交媒體上表態、用標籤審判他人、參與網絡圍剿，比真實改善社會更重要。Emma當年高調支持，今日卻被同一陣營拋棄，最終兩面不是人。如今卻證明咗Rowling一直強調嘅：「呢啲人根本唔係真心為咗女性，佢哋只係沉醉於鬥爭同道德審判。」

喺呢班自詡「正義戰士」嘅大力推動下，過去十年全球社會究竟係變得更好，定係更亂？答案，唔駛我講，大家心中有數。