天韓地凍會 -- 韓劇: 牽牛和仙女 견우와 선녀

圖：tvN 截圖 | 文：柴笛該也

獻給我愛嘅每套韓劇、每個綜藝、每部電影；用港式廣東話口語，與你分享點滴。

本來喺第81期出嘅《牽牛和仙女》，因為TIFF而讓路，順延至呢期找數啦，不甘淪落為「食file湯」。

由2025年6月23日到7月29日嘅tvN月火網改劇《牽牛和仙女》(견우와 선녀 / Head Over Heals)，首播取得4.3%收視，劇集後半更趨凌厲，大結局(首都圈)破5.1%；喺臨尾嗰個星期，演員話題榜盤踞榜首，網民跪求HE 🤣。

廣東話有句俗語：人衰行路打倒褪，原來仲可以再衰啲。18歲嘅slasher朴星娥(趙怡賢 飾) 正職係巫堂(무당 女巫師)、副業係中學生。「天地仙女」星娥蒙住面開工時，初遇裴堅遇(秋英宇 飾) 就一見鐘情，以靈眼見到呢個男仔180度雙腳朝天、上下調轉行，乃「終極黑仔王」之凶兆。初戀情人呃運纏身，星娥唔出手相救，堅遇命仔凍過水，偏偏黑馬王子最討厭就係巫師…由金容完PD執導、楊志勛編劇執筆，係一個雙向救贖、尋找幸福嘅故事。

雖然主題圍繞巫族信仰中嘅靈異與驅魔，《牽牛和仙女》歸類為romcom，啲「阿飄」特效、畫風唔會太驚悚；直到最後都充滿驚喜，讓觀眾睇得既肉緊又過癮。

近呢年嚟幾套韓劇，不約而同都有一人詮釋兩角(或者更多)嘅橋段，for example：《玉氏夫人傳》(同樣係秋英宇)、《致我的解離》(申惠善)、《鬼宮》(陸星材)、《苦盡柑來遇見你》(IU) 、《未知的首爾》(朴寶英、李在仁、南允浩)等，而根據往例，呢啲演員都有頗高機會喺頒獎禮獲提名，甚至攞獎。恭喜返秋英宇先，佢啱啱喺7月以漫改劇《外傷重症中心》榮獲第4屆青龍系列男新人獎。當然，正路嚟講，演技無番咁上下，都唔會cast啲咁難嘅角色，無咁唔知醜、搭沉船㗎嘛。

講返搞到文章要順延，唔使問阿貴，梗係無「超前部署」。柴笛唔叻，唔似陳國基「寧安全、莫後悔」、天文台黑雨「超遲部署」、做乜叉都應該唔會搭沉船咁叻，除非係賊船。在此不設提問環節，其事忙先走，佢鏟屎官話嘅 😎。

See you next time👋！