top of page
  • KongED2

[天韓地凍會] -- 韓影︰韓國影業名詞篇 (2) - 忠武路演員

文︰柴笛該也

獻給我愛嘅每套韓劇、每個綜藝、每部電影;用港式廣東話口語,與你分享點滴。


最近播完嘅tvN韓劇《浪漫速成班》,被「後生啲/入坑尚淺」嘅外國網民狠批男女主角CP感差、女一「師奶味重」又唔靚、接吻戲被形容為慘不忍睹、睇唔落去、女一全度妍襯唔起男一「鄭少女」(鄭敬淏嘅nickname) 、物物乜乜… 反而韓國觀眾對呢套劇嘅認受度卻啱啱相反,喺韓國收視越嚟越好,大結局嘅全國收視率以17.038%、首都圈更以亮麗嘅19.797%高收,成績非常有交代🤩!


要解釋呢個現象,柴笛該也認為,需要理解「忠武路演員」(충무로 배우) 呢個神聖不可侵犯嘅title,對韓國人嘅影響何其深遠!


上期(第46期) 簡單介紹咗「忠武路」嘅由來(唔知「忠武路」係乜嘅,請先爬文),而「忠武路演員」銜頭,正正係將一群頂尖嘅實力派演員,從其他演藝界人士mark咗出嚟,honour 佢地一番,賦予佢地喺業界崇高嘅地位。First of all,你唔孭得飛,自然冇份參與電影,而叻到被邀、幸運地參與到票房高、口碑好嘅電影嘅演員,亦未必係「忠武路演員」!要擁有呢個「忠武路演員」光環,個演員一定要獲得過韓國三大電影獎嘅獎項 (唔知「三大電影獎」係邊三大,請先爬第44期文)。冇攞過三大電影獎任何嘅獎項,話之你叻到識飛、紅到街知巷聞、甚至衝出韓國、上埋太空😅,sorry噃,你都唔配被稱為「忠武路演員」!嗱,OTT平台「Netflix之子」宋江夠炙手可熱、《黑暗榮耀》嘅「喬妹」宋慧喬夠紅喇啩?舊年年底韓國3個電視台嘅視帝李鐘碩、朱相昱、金南佶夠勁喇啩?K-Pop表表者「Oppa江南Style」同「馬舞」始創人PSY、BTS嘅V、Blackpink嘅Jisoo等又唱又演,將「韓流」推向全世界、夠貢獻喇啩?SORRY囉,呢班人未獲三大電影獎任何認證,未夠資格做「忠武路演員」呀!


Back to《浪漫速成班》︰女主角全度妍1997年第一套電影《傷心街角戀人》已經令佢位列「忠武路演員」,喺26歲之齡榮登韓國「演技大滿貫」,喺法國康城電影節贏埋最佳女主角,亦做過康城電影節評審,簡直係大韓民國之光🤩;男主角鄭敬淏2004年出道、未係「忠武路演員」(得罪啲講句,佢「流」都未「入」到…)。所以,喺韓國觀眾心目中,層次高幾皮嘅全度妍與鄭敬淏同框,實屬「女尊男卑」,唔會覺得全度妍「襯唔起」鄭敬淏㗎!所以韓國netizens若然對呢套劇有乜失望、不滿呀,都只會關第二啲嘢(例如劇情)事,唔會關全度妍事😂!


考試︰搵出以下所有尚未成功擠身影壇「忠武路演員」之列嘅artist

Rules︰因為講緊電影,所以any三大電影獎都計with this exception: 百想藝術大獎中嘅獎項,只計電影部門獎,drama部門獎唔計😉

答案下期開估。See you next time👋!




40 次查看0 則留言

Comentarios


bottom of page