圖：互聯網 | 文︰Gary Charm
以前喺香港，每逢跟阿媽去親戚屋企拜年，一輪交禮物之後通常都冇乜嘢講，但係又未有咁快走得。如果大家冇新話題（或者開枱打麻雀），好大機會會俾長輩問你拍拖未？結婚未？升職未？真係大吉利是！好在，呢個時候電視永遠會重播幾齣賀歲片，你只要專心去睇，長輩們就好少會打搞你~~
嚟到Edmonton，我哋冇乜機會拜年，但係新年要睇港產喜劇已經成為習慣，偏偏呢度又冇CCTVB幫我哋隨機播片，惟有自己搵。喺Edmonton要睇港產片唔難，除咗有幾個串流平台或者收費電視之外，大家可能都有萬惡嘅機頂盒；除此之外，其實亦有唔駛錢嘅Youtube。Youtube依家有大量八、九十年代港產片，其中有唔少解象度都好高，幾有DVD級數，就算喺屋企大電視睇都冇問題。惟一缺點係，部份電影因為配樂版權受限而在某些段落被消音……算啦，起碼知佢合法。
講到賀歲片，大家都會諗到周星馳電影、《家有喜事》系列、或者劉華嘅《嚦咕嚦咕新年財》。如果你睇厭咗，可以試試我今日介紹嘅《92黑玫瑰對黑玫瑰》。
《92黑玫瑰對黑玫瑰》，上映日期為 92年7月，雖然不是賀歲片，不過仍適合新年睇。起碼我依家睇，仍然可以笑出聲。編導是劉鎮偉。劉大導是一個喜劇鬼材，是王家衛的好友，曾用一齣《東成西就》，解救王的困境。劉鎮偉又多次和周星馳合作，其中《賭聖》、《西遊記》上下集、《回魂夜》都是由他導演。甚至連星爺的收山作《功夫》，也要特地邀請他幫忙。所以看《黑玫瑰》，也會見到類似的部署和節奏。演員有馮寶寶、黃韻詩、梁家輝、毛舜筠、邵美琪，論演技論喜劇節奏，前四位真係高手過招；邵美琪明顯稍遜，不過當年是邵美琪的顏值巔峰，眼大大面圓圓加上角色傻傻戇戇，超級可愛。
故事講述：毛舜筠、邵美琪原本只係普通女人仔，無意中和黑道壞人結怨，兩人被追殺。逃亡期間，結識了警察梁家輝，又撞巧惹著了俠盜「黑玫瑰」的傳人馮寶寶、黃韻詩……故事當然無厘頭，特別在於電影的設置擺明卡通，讓演員盡情發揮，其中最搶戲一定是梁家輝。梁的角色說白了是扮演呂奇。呂奇這位傳奇演員是上一代香港人的集體回憶，曾有多位藝人扮演過。較早期的有羅梏皆、本片之後就有《難兄難弟》的羅家良了（我有時會懷疑，在香港除了李小龍之外，呂奇是最多藝人扮演過的藝人。）只是梁家輝特別厲害，很能善用自己那對蝌蚪眼與及他自己獨有幽默感，幾乎每次出場都有笑料。另一高手是毛舜筠，劇中綽號「淫賤住家菜」，其實只係怕事師奶仔一名，又係一出場就好笑。電影中段就到毛舜筠被人綁架，她要想辦法逃走，簡簡單單的就搞到好好笑，我好想繼續睇。
馮寶寶和黃韻詩是黑玫瑰後人、是隱世武林高手，玩味十足。不過感覺有點奇怪，前半段我較喜歡黃韻詩，後半段會是馮寶寶更有趣；可能是因為黃的角色越到後來越煩膠吧？
本片開宗明義向舊電影致敬，除了挪用「黑玫瑰」、「呂奇」等人物外，電影的佈置、機關、服裝也充滿心思（當然不能和今日的Barbie去比啦），最特出是兩首舊電影歌曲：《舊歡如夢》、《你歸來吧》，拍得又好聽又笑，無怪當年立時牽起一陣熱潮。
Comments