top of page

【血洗唐人街】

本文刊出日,仍是農曆正月。新正頭,就為身處北美的各位介紹一齣「紅噹噹」的電影去旺一旺--------【血洗唐人街】!!!!!

【血洗唐人街】,1982年電影,導演蕭榮,演員有鄧光榮、黃錦燊、鍾慧冰、廖駿雄。Youtube有得睇~~~

故事講述:美國紐約唐人街有兩班黑幫,一班係好人(鄧光榮為首),另一班係壞人(黃錦燊為首),然後打呀打呀、殺呀殺呀!!!!

電影全紐約唐人街實景拍攝,據講全隊製作人員連演員只有20人,其他都是當地邀請臨時演員,其中主要為當地黑幫和大學生,甚至還有真警察協助……組合還真特別。說起鄧光榮先生,年輕朋友對他最大印象可能只係他怒斥鄭少秋一幕。不過多年來我聽過許多點點滴滴,我相信鄧先生是一位值得尊敬的人。至於有關藍小姐傳聞,始終資訊太少,我存疑。說回電影,大家都知鄧先生係江湖猛人,佢做呢種大哥角色絕對無得頂。佢一坐喺度,成班𡃁必恭必敬果種氣勢,鄭伊健真係再投幾次胎都做唔到。


作為上一代香港人,鄧先生有自己一套價值觀,我簡單形容為「大中華膠」,佢亦會將諗法融入電影入面作為所謂教育意義。其中論點,現代人未必同意,但係我都會明白,佢所講嘅嘢會係當年香港人主流思想。

黃錦燊飾演大奸角,陷人不義、淫人妻女,夠斯文敗類、夠乞人憎。但係另一邊廂,鍾慧冰(戲中女主角)在自己網台講述當年回憶,說黃先生原來係超級愛妻號,晚晚會霸住個電話(劇組職員居所只得一個電話)同趙雅芝講長途電話,講到成份片酬都要俾晒電話費不特止,仲幾乎激起公憤,於是乾脆買機票接趙雅芝過嚟紐約,一邊拍戲一邊拍拖,和角色反差極大,都幾搞笑。其他角色方面,我會想提一提廖駿雄。如果你同我差唔多年紀,未必會記得廖駿雄這個名字,但係一定記得佢個樣。廖先生有一段很長時間喺TVB做萬年綠葉,大大隻隻、有時會留鬚,可能因為眼圓圓加上胖胖的,通常都係做傻傻戇戇的角色,辨識感好高。喺呢齣戲內,佢個名叫大傻,又係類似角色,已經相當搶鏡。可惜廖先生一直未有好大發展,我自己印象中,佢最後一齣電影已經係2001年劉華的【全職殺手】,不知他近況如何?


用依家眼光睇,老實講故事唔算吸引,戲名叫「血洗」,佢老哥連血都係有限公司,僅僅多過迪士尼Marvel電影,好失望。不過幾有獵奇色彩,加上有真黑社會客串,都幾過癮。正正經經坐喺屋企開嚟睇可能會失望,不過如果閣下返工係對住部電腦,可以無聊射波開嚟睇就啱啱好。


電影:

鍾慧冰女士的頻道:


11 次查看0 則留言

最新文章

查看全部

Comments


bottom of page