天韓地凍會 -- 韓劇: 家母螳螂 사마귀:살인자의 외출

圖︰SBS 截圖 | 文︰柴笛該也

獻給我愛嘅每套韓劇、每個綜藝、每部電影；用港式廣東話口語，與你分享點滴。

年初第74期提過MBC改編德國劇《白雪公主非死不可—Black Out》，套劇嘅導演邊永姝乃梨花女大法律系出身，過往作品大幅描寫人性、人權(包括女權)、歧視等深度社會議題。今次夥拍百想、青龍2024年最佳電影《首爾之春》編劇李英鐘，打造出8集金土劇嘅《家母螳螂 》(사마귀 : 살인자의 외출，Queen Mantis)，由2025年9月5到27日喺SBS播出，海外由Netflix同日上線。

《家母螳螂 》翻拍自法國同名影集《La Mante》(2017)，屬 crime+suspense thriller。故事描述外號「螳螂」、正在獄中服刑嘅連環殺人犯鄭怡信(高賢廷 飾) ，被廿幾年前親手遞補佢嘅刑警崔重浩(趙成夏 飾) 隱密邀請，協助緝捕最近出沒嘅連環殺人犯「螳螂copycat」歸案。鄭怡信扤頭，但係只會透過同佢離異多年、喺毒品科做嘅警察阿仔車秀烈(張東潤 飾)傳話。

高賢廷釋放「螳螂女王」詭異氣場之從容、堅定，與費盡九牛二虎之力去救人、意圖彌補「阿媽係殺人犯」呢個心理陰影嘅張東潤展現嘅掙扎、起伏感對比懸殊，好戲連場無容置疑。《家》畫面震撼，不乏血腥，意識駭人，時而露骨嘅性暴力(尤其尾集「19禁」) 非常崩潰；節奏緊湊，張力十足，估「真兇」嘅過程反轉再反轉，喜歡懸疑犯罪片種嘅朋友可以一試。

邊永姝導演希望讓觀眾領悟幫助弱者嘅惻隱之心、嗰條唔能夠越過嘅線，你搵到了嗎？因《家》涉及家暴、虐兒、性侵、原生家庭嘅烙印，加上保護者嘅不作為、法律制度嘅缺失、私刑正義等敏感且沉重嘅題材，網民表示晦澀味濃，再返煲嘅機會低，but如果開Season 2就會追。柴笛都祝願S2成事，事關雖然劇中嘅「螳螂女王」選擇唔見個仔，但係現實生活中嘅現任新世界百貨主席前妻高賢廷又可以透過套劇俾佢兩個「被離異」嘅仔女喺大氣電波見到。That said，就算製作團隊決定暫時唔去馬搞第二季，都應該唔會搬「全球貿易戰」同「地緣政治」咁grand嘅理由解釋啩！點似得港府班「智將」咁「食腦」度到呢條橋，以此為由宣布「維持暫緩」垃圾徵費啫🙄。

See you next time👋！