文:柴笛該也
獻給我愛嘅每套韓劇、每個綜藝、每部電影；用港式廣東話口語，與你分享點滴。
上期問題(「忠武路三駕馬車」(男)/「忠武路三金」/「忠武路四小生」)嘅答案，分別用深黃、橙、綠色顯示如下
「忠武路三駕馬車」(男)，代表著近呢3、40年嚟韓國電影史上不可或缺、演技造詣達到巔峯境界嘅三位殿堂級男演員(排名不分先後)︰崔岷植(《原罪犯》(2003)、《鳴梁》(2014)、《奇怪的數學家》(2022))，宋康昊(《辯護人》(2013)、《逆權司機》(2017)、《寄生上流》(2019)、《Broker》(2022))及第48期提及過嘅《格殺福順》男一薛景求(《實尾島》(2004)、《人民公敵2》(2005)、《海雲臺》(2009)、《不汗黨》(2017)、《Kingmaker》(2022))；三位都位列「千萬演員」(套戲嘅入場人次過千萬人次 i.e. 至少五分一國民扲荷包、買飛入戲院睇過)。So far，南韓國產電影全國觀影次數最高嘅頭廿名，大概有三分一，係佢哋三位其中一位有份参與，證明咗三位駕馭各種各樣、唔同類型角色嘅能力精準非凡，係被觀眾信賴嘅魅力男演員。
註明搵男，係咪即係有女版？無錯呀，你估啱咗呀，而且每段時期，都會有特別出色嘅三位天后，被韓國傳媒稱呼為troika(트로이카) ( i.e. 三駕馬車) 。不過，如果數三人組平均最多產嘅，應該非佢哋莫屬︰上文提過嘅尹靜姬&文姬、及南貞妊，就係被譽為「韓國電影黃金期」（上世紀六、七十年代）嘅 忠武路一代troika。呢個三人幫嘅電影作品非常多，多到以今日嘅standard 係不能想像咁痴線，密密拍，閒閒地一年以「打」(dozen) 計。例如文姬，喺1970嗰年有50+套戲上畫，即係，文姬差唔多每星期轉一次project，一日唔知有冇九組戲 (諗起DoDo「鄭九組」) 咁多，真係人都癲😱。That said，個人至多產嘅，係比佢哋早啲出道、繼而同佢哋展開激烈競爭嘅金芝美(「元祖troika」之一) ，好似話拍咗大約800部，數目多到韓國有句話係咁講嘅︰「電影分為兩種，一種係有金芝美拍的，另一種係無金芝美拍的。」Think: Canada has 2 seasons; Winter and Construction 😂。 (對韓國近百年電影史有多啲啲興趣嘅同學，可以自行觀看此文，以作参考。)
一代troika左起: 文姬、南貞妊、尹靜姬
「忠武路三金」，韓文「스크린 3金」=「Screen 3金」，as supposed to 韓國嘅「政壇三金/三金時代」(金泳三，金大中，金鍾泌)，用嚟形容喺螢幕事業升勢凌厲嘅三朵金花︰金高銀，金多美，同埋金泰梨。三個「90後」都曾有過「怪物新人」封號，皆因佢哋嘅出道作品都備受肯定，掃走大大小小影視圈嘅「新人獎」，好似CookieMonster食cookie咁食ᕦ⊙^^^⊙ᕤ。
Last but not least，「忠武路四小生」，係指「後起之秀」嘅四名「80後」男演員(排名憑三大電影演技獎項分先後)︰劉亞仁(演技出色到開劃咗以佢命名嘅「亞仁時代」)，金秀賢，李帝勳及宋仲基；亦有部分韓媒會認為李民基(《海雲臺》(2009) 、《戀愛的溫度》(2013) 、drama:《今生是第一次》、《我的出走日記》) 強過李帝勳(《青春夜行》(2011) 、《朴烈》(2017) 、drama:《Signal》、《模範的士》系列)，將李同其他3位冠為「忠武路四小天王」…家吓排人氣嘅，次序就最前變最後。That said，假以時日，罹患骨瘤嘅劉亞仁能否 OR 會否想rebound，就要睇因緣際會、睇亞仁能否再占天時地利人和啦。BTW, 早排李帝勳宣傳《模2》時放風，話會追吓《Signal 》編劇金恩熙，問吓幾時動筆寫《Signal 2》… 希望金作家可以喺SBS新劇《惡鬼》煞科後開工啦 😹。
認得晒呢拃「忠武路」衍生出嚟嘅相關稱號，都差唔多、夠用一輪㗎啦。「影業名詞篇」到此爲止🎉，下期可以開波、傾movie啦。See you next time👋！