KongED2
- 2023年6月9日
- 讀畢需時 3 分鐘

天韓地凍會 -- 韓影︰《犯罪都市》系列 범죄도시 시리즈

圖︰《犯罪都市》系列 | 文︰柴笛該也

獻給我愛嘅每套韓劇、每個綜藝、每部電影；用港式廣東話口語，與你分享點滴。

2022年韓國所有片種混合計嘅 box office number one、佔南韓電影all-time「千萬觀影人次」榜top ten一席嘅《犯罪都市2》(港譯：《犯罪都市：極拳執法》) ，係《犯罪都市》series入邊、四部作品(so far)嘅 second installment。

2017年， as a rated 「紅標18禁」嘅《犯罪都市》，票房係「18禁」電影類別排第三、係impressive嘅。呢套戲為姜允成導演贏得百想大獎最佳新人導演獎，同埋為陳善圭(第25期 feature 過嘅《解讀惡之心的人們》)贏嚟青龍獎男配角獎，可以話商藝兼備。至緊要係《犯罪都市》「開靚咗個頭」，將2005年出道嘅大隻佬馬東石，堆上國民喜愛級別，更加將「以暴制暴伸張正義」嘅concept、為犯罪動作片殺出條新血路 (pun intended)。

挾《犯罪都市》威名嘅《犯2》除咗賣座，喺各大、小電影獎項成績表都非常不俗。前前後後擸咗新人導演獎李尚龍(《犯3》導演)、男主角獎馬東石、男配角獎朴智煥、新人男演員獎孫錫久、最受歡迎電影獎 / People’s Choice Award、技術獎、攝影獎、剪輯獎等。

上星期三、 5月31日，萬眾期待嘅《犯罪都市3》(港譯：《犯罪都市：鐵拳掃毒》)喺韓國上咗畫。開賣首天朝早9點嘅預購率(for嗰日)超過87% 、預購觀眾人數為627,636人(注1) ，結果全日觀影人次累計740,875名(注2) ;第5日中午已累積達4百萬人次(注3)，成績相當相當驕人！睇個勢，要達千萬人次唔係問題，問題甚至唔係《犯3》可摸耳超越《犯2》，而係可以媲美since 2014已雄踞南韓box office榜首嘅《鳴梁》幾多項佳績 (注4) (按：第52期講過嘅《鳴梁》，首映日觀影人數682,701、首映週末(Fri to Sun)人次3,357,346、單日最高(齋計自己)人次 1,257,380、第12日過千萬、總觀影人次1761萬、4項「三大」嘅大獎(注5)等等)！留意返：對上兩次第4日達4百萬人次(cumulative) 、馬東石都有份做嘅《與神同行：終極審判》(2018)同埋《屍速列車》(2016) ，都喺正七月尾、八月頭嘅暑假黃金檔期上畫，今次《犯3》卻連夏至都未滿，已經搞成咁，非常屈機。來年嘅各大小電影頒獎禮，馬東石&Team應該會頻頻上台喇🎉。BTW，加、美大城市都有《犯3》screening(搵《The Roundup : No Way Out》showtimes)，唔知有無鐵粉睇咗呢?

《犯罪都市4》預計喺明年release，唔知擅長武術設計&指導action scene嘅許明行debut為導演，會同親自handpick佢嘅馬東石(身兼監製，所以有say) 擦出乜嘢煙花呢? (按：無見韓國影壇獎項，會預動作指導一份;有導演名銜，先有機會得獎、獲得影業嘅public recognition、推廣武行嘅重要性，為自己、為龍虎武師創造更有利嘅工作環境;加油呀，許導。)

《犯》系列嘅 story framework，係有極度兇殘、犯罪成癮、單靠啲「冷氣軍師」、行行吓樓梯會PK啲長官搞唔掂嘅badass出沒，需要肯衝鋒撼陣、埋身肉搏、「佢手臂粗過你大髀」嘅英雄撥亂反正。《犯》系列嘅casting頗見心思，由2013年已經係百想最佳男配角、「老襯頭鱷魚底」、頭動作乾淨俐落嘅馬東石飾演「怪物刑警」乃不二之選;做main antagonist嘅尹啟相 (《犯1 》) ，難免令人懷疑：「搵個官仔骨骨嘅去打喎，得唔得㗎…」… end result係觀眾有高度嘅新鮮感，無論演技、做型都令人為之驚艷；孫錫久(《犯2》、drama《我的出走日期》)、李浚赫(《犯3》、drama《秘密森林》系列)就唔使再懷疑，乖乖買飛入戲院啦。得咗！而且成百分鐘嘅戲有好多笑位，對白抵死，睇啲壞人被馬刑警(馬東石飾)調教好爽㗎🤣。

《犯2 》& 《犯3》同屬於「橙標15禁」，15歲以上需家長或監護人倍同方可(or 便可)入場觀看，有利於票房，卻惹道德人士之垢病，甚麼教壞青少年；《犯1 》& 《犯2》有大量血淋淋嘅場景，「脾虛胃弱」、「潔癖人士」無謂攞苦嚟辛；嚟到《犯3》，馬刑警話，「開夾萬(保險箱) 凈系得鋪牛力點得啫，要「食腦」㗎，Bingo」！笑到肚攣 🤭。